Orsakað av eini ómøguligari fiskivinnuskipan, er útróðrarbáturin ANRU við Gundur Sørensen dottin niður ímillum “fínu” reglugerðingarnar hjá Fiskivinnustýrinum.

Gundur Sørensen, ið er kendur útróðrarmaður og fiskimaður keypti ein stóran plastbát, gamla Grindafoss, í juli mánaða í ár.

Av tí at reglurnar, sum Fiskimálastýrið hevur sett upp eru so háttaðar, so sleppur ANRU ikki í bólk 5A fyrr enn hann í eitt rakstrarár hevur prógva at báturin verður fult rikin. Tí verður hann flokkaður í bólk 5B, sjálvt um ANRU hevur verið fult rikin líka síðani hann var keyptur og tað hevur harafturat ligið stak væl fyri við fiskarínum.

Nú ongir fiskidagar eru eftir til bólk 5B, hava bæði teir fýra menninir, sum hoyra til bátin og egnararnir gingið norðuri í Hvannasundi uttan inntøkuna frá bátinum.

Nógvur fiskur er at fáa. Í gjár var ringt veður og ein av stóru línubátunum á Klaksvík gjørdi av at seta línuna frá Líðarmunna í Djúpunum og norðureftir, faktiskt á snørisleið hjá smábátum, teir fingu góð 13.000 pund av góðum fiski.

Tað er ein sera óheppin støða hjá einum av okkara bestu fiskimonnum, at vera komin í, nú hann hevur spent seg fyri at keypa sær ein framkomnan útróðrarbát.

Politiskt hoyrist bert snakk.