Tað ber ikki til at siga, at Koks hevur havt tað lætt í Føroyum. Hon hevur livað við fyribilsloyvum, og myndugleikarnir hava ikki gjørt tað lætt fyri lítlu matstovuna í heimsflokki. Matstovan vil fegin húsast í náttúruvøkrum umhvørvi, men við okkara túsundáralongu náttúrusøgu eru óteljandi atlit at taka. Við Gjónna vóru tað frítíðarfiskarar, og nú órógva ætlanirnar ein køst, sum bóndin ætlar at leggja á staðnum, Koks hevur útsæð sær.

Óansæð hvørjum ein “heldur við” í málinum, so mugu allar góðar kreftir síggja, at Koks hevur eitt ómissandi virði fyri Føroyar. Nýggja grøna stjørnan merkir, at matstovan eisini skarar framúr, tá tað kemur til burðardygd, og tær báðar michelinstjørnurnar merkja, at matlistarliga er Koks í heimsflokki. Vit hava við ein úrmæling at gera, og teir skulu eggjast og stimrast.

Tað var á hátíðarhaldi í Trondheim í dag kl. 17, at Koks, umframt at varðveita sínar báðar verandi stjørnur eisini fekk ta grønu fýrasmæru-stjørnuna fyri “Sustainability”.