Tjóðsavnið á rannsóknarferð Uppi á Grundum
Tjóðsavnið hevur framkomna tøkni at kanna og skráseta fornminni við. M.a. brúka teir dronu at flúgva eitt øki við, har teir kunnu skráseta tað, sum sæst í lendinum. Eisini kunnu teir gera 3D-kort, sum neyvari greiðir teimum frá tí, ið sæst í lendinum.
Søgan Uppi á Grundum er kend og eru heitini á húsinum kend, eins og tey síggjast væl í lendinum. Við flúgvingini ber til at gera vanlig kort, sum siga stødd og staðseting av húsunum.
Teir høvdu eisini GIS-skipna við, har tú kanst uppmáta, koordinatseta og eyðmerkja støð, húsahorn og hæddir. Hetta kann so eisini samansetast við dronuflúgvingunum.
Eisini gjørdu teir ein boriprøva við einum um 1 m longum bori, ið sigur nakað um tilfarið, sum liggur undir. Tá ið vit komu framvið, gjørdu teir ein boriprøva við sunnasta høga “heyggin”, sum sigst vera øskudungin. Teir komu í fyrstu syftu ikki so langt niður, tó at teir við hesi einu royndini dugdu at síggja nakað av øsku.
Tjóðsavnið hevur verið ymsa staðni og kanna øki, serliga har byggingar og byrringar annars eru ætlaðar at verða – Við havnalagi í Ánunum, í Hvannasundi, á Norðoyri norðanfyri vegin til lendingina, har hildið verður, at eitt bønhús hevur staðið.
Eitt av endamálunum Uppi á Grundum í Gerðum er at fáa avmarkað hvar fornminnir eru, so tann møguligi vegurin til tunnilin norður um Fjall kann leggjast soleiðis, at hann ikki er til ampa fyri fornminnini í økinum. Hetta vóru serligu ørindini hjá Tjóðsavninum á hesum sinni Uppi á Grundum.
Her er ein leikja til 3D-modellir, sum er gjørt úr dronumyndum:
https://sketchfab.com/3d-models/a-oyri-noroyri-boroy-froyar-7d4cc9b08ddc4d538acb7889d0020188
Her er ein leikja til skrásett fornminni
https://umhvorvi.maps.arcgis.com/apps/webappviewer/index.html?id=eb9f42d1199c4954bf75fe12caca273d