Lýsing

BTSF fyllir 40 ár í dag

SKRIVAÐ: Jóhann Lützen  |  16.05.2020 - 23:55 Ítrottur Tíðindaskriv

Í dag eru 40 ár liðin síðan Borðtennissamband Føroya varð sett á stovn. Borðtennis í Føroyum var í mong ár skipað av einari borðtennisdeild, men á aðalfundi 25. oktober 1979 varð samtykt at skipa seg sum sersamband undir Ítróttasambandi Føroya, og 16. mai 1980 varð Borðtennissamband Føroya sett á stovn.

Nevndirnar

 

Fyrsti formaður í Borðtennissambandi Føroya var Ronnie Midjord av Tvøroyri. Afturat sær í starvsnevndini hevði hann Helga á Fløtti sum næstformann og Jóannes Ellingsgaard sum skrivara. Í kappingarnevndini vóru Hákun Djurhuus, Ivan Niclasen og Hákun Olsen, og formaður í fíggjarnevndini var Finn Thomsen.

 

Formenn- og kvinnur í starvsnevndini í Borðtennissambandi Føroya hava síðani verið Finn Thomsen, Grækaris D. Magnussen, George Niclasen, Niels Petersen, Leo Poulsen, Andras Nolsøe, Ivan Niclasen, Jóannes Guttesen og Elinborg C. Mortensen. Elinborg varð vald til forkvinnu í fjør og er fyrsta forkvinnan í søgu Borðtennissambandsins.

 

Búmerkið

 

Fyri at finna eitt hóskandi búmerki til Borðtennissamband Føroya valdi nevndin  í 1981 at útskriva búmerkjakapping. Inn komu 15 uppskot, og tá ið saman um kom varð uppskotið hjá Jákupi Hjaltalin valt. Hann fekk 2000 krónur fyri ómakin, og Borðtennissamband Føroya hevði nú fingið sítt fyrsta búmerki.

 

Borðtennissamband Føroya fekk nýtt búmerki í fjør. Avrátt varð, at búmerkið skuldi vera meira tíðarhóskandi, og at tað í størri mun skuldi vera hugkveikt av litunum í Merkinum – at grái og grøni liturin í gamla búmerkinum skuldi býtast um við reytt, blátt og hvítt. Nýggja búmerkið gjørdi nevndin í samstarvi við grafikara.

 

EM í Bern í 1980

 

Hóast Borðtennissamband Føroya ikki varð sett á stovn fyrr enn í 1980, so fekk føroyskt borðtennis altjóða limaskap miðskeiðis í 1970-unum. Tað var ein av undangongumonnunum í føroyskum borðtennis, Sverre Midjord, sum tosaði við formenninar í norska og svenska borðtennissambandinum, og fekk teir at stuðla einari føroyskari umsókn, sum varð gingin á møti, og sum slóðaði fyri at borðtennis, sum ein hin allarfyrsta ítróttargreinin í Føroyum, fekk altjóða limaskap.

 

Stovningsárið 1980 luttók føroyska borðtennislandsliðið í EM í Bern, Sveis. Teir, sum mannaðu føroyska liðið, vóru Rólant Sørensen, Christian Christiansen, Birgir Carlsson og Jógvan Ellefsen. Ferðaleiðarar vóru Sverre Midjord, Ronnie Midjord og Finnur Helmsdal. Mótstøðulondini vóru eitt nú Vesturtýskland, Tjekkoslovakia, Noreg, Malta og Sveis. Hetta var stinn mótstøða, og føroyingarnir vunnu einki sett, hóast tað í nøkrum førum var tætt við.

 

Sum nýggjur limur í stóru familjuni fekk føroyska liðið nógva umtalu í bløðunum í Sveis, og varð bjóðað saman við danska liðnum til móttøku á donsku sendistovuni í Bern. Danski sendiharrin, Erik Thrane, sum var fyrrverandi ST- og EFTA-sendiharri í Geneve, og kendi væl føroysk viðurskifti, gleddist um at sleppa at heilsa upp á føroyingarnar.

 

Dagin fyri at EM varð sett gjørdist annars greitt, at sveisisku fyriskipararnir ikki áttu nakað føroyskt flagg til setanina. Hetta fann Sverre Midjord seg als ikki í, og hann syrgdi fyri at eitt føroyskt flagg varð seyma náttina upp til setanina. Tá ið saman um kom bleiktraði Merkið tískil á jøvnum føti við hini londini til setanina, og hetta markaði eina altjóða limaskap og luttøku, sum Føroyar hava hildið síðani.

 

Í dag

 

Borðtennissamband Føroya er í dag mannað við starvsnevnd og kappingarnevnd eins og slóðað varð fyri í 1980. Virksemið hevur verið støðugt øll árini, og Borðtennissamband Føroya leggur dent á at røkja sín altjóða limaskap við at luttaka í EM, HM og á altjóða nevndarfundum.

 

Tað er sum heild nógv virksemi á skránni - bæði her heima og uttanlands. Her heima verða umleið 10 kappingar spældar árliga, og uttanfyri landoddarnar hava ungdómslandsliðið og A-landsliðið eisini nógv spennandi á skrá, sum er eggjandi fyri leikarar og sum samstundis er við til at mynda Føroyar og føroyskt borðtennis úteftir.

 

Lýsing
Seinastu tíðindini
Nú ''byrjar'' kappingin hjá KÍ
Korona hevur ávirkað kappróðrarfyrireiki…
Dartfelagið nógv at gera á Norð­oyastevnu
Maskinsmiðir prógv á TSK
Tónleika­rundferð við Danny og Inga
Rókur Davidsen vann øll talvini
Stroyming: Dartkapping á Norð­oyastevnu
Heimið er, har hjartað er
Tónleika­rundferð við Danny og Inga í dag
FLEIRI KONSERTIR VIÐ DANNY OG INGA LEYGA…
Hjálparpakki 4 verður nú settur í verk!
Poul Mohr (21.08.1929  - 16.06.2018) - f…
Norð­oyastevnan í dag
Neytabúffar av Sandi á Norð­oyastevnu
KÍ kann fara frá hinum
Myndarøð: Fuglberg og Skoraberg afturkom…
Kappróðu­rin útsettur til sunnudagin
Nei til lættari atgongd til rúsdrekka
Magnus Heinason kannað æti, fiskalarvur…
Ráðstevnan ið kostaði 250 tús. kr.