Lýsing
Í firtni yvir at Carla Sands leyp miðstaðarpressuna um, bryggjar Birgir Kruse eina patetiska konspiratiónsteori um, at USA, Betesda og Norðlýsið eru gingin saman um at hata Havnina. | Mynd: kvf.fo

Konspiratións-Kruse manglar bara Illuminati

SKRIVAÐ: Jóhann Lützen  |  09.07.2020 - 18:28 Leiðarin Tíðindi

Við at lesa bloggin hjá Birgiri Kruse, “At flúgva undir radaranum fyri at gera størstan skaða”, fær lesarin ta fatan, at ein myrk konspiratión er gjørd millum Betesda og Hvítu Húsini, sum Norðlýsið verður lagt undir at katalysera, eins og uppskotið um Bústaðir er við í hesi konspiratiónini, ið skal eitast fyri botna í havnahatri. Men verður greinin nærlisin, eru fleiri ábendingar um, at Birgir Kruse bert er særdur av, at Carla Sands ikki vitjaði sín bý.

Kruse rundar sín absurda, men stak undirhaldandi blogg við við einum cliffhangara um “sandósan har norðuri”, har “frúgvin Sands” skal hava havt ørindi, ivaleyst sipandi til samkomuna Betesda. Meginparturin av blogginum er ein sveimandi konspiratiónsteori, sum ikki er verd aftursvar, men nakrar misskiljingar eru eisini, ið ikki kunnu standa órættaðar.

Fyri tað fyrsta vitjaði Carla Sands ikki í Betesda, men í Christianskirkjuni.

Fyri tað næsta er tað ótrúligt, at Kruse fær arbeitt havna-hatur inn í vitjanina. Øll samrøðan við Carlu Sands liggur tøk á heimasíðuni hjá Norðlýsinum, og Tórshavn verður ikki nevnd við einum einasta orði. Tá Kruse spyr “Og hví er so lætt at fáa Klaksvíkina á tal hjá einum fremmandum gesti?”, er tað, sum nívir, at hon ikki hevði ørindi í Havn, ella hvat bagir?

Fyri tað triðja kann ongin í Klaksvík taka sær av ella gera vði, at “tey etableraðu” í Havn vórðu umlopin.

Tað er ein sjálvfylgja, at vit fjølmiðlar tosa við útlendsk sendifólk, tá tey eru her. Okkara uppgáva er at bera tíðindi, og tað eru altso tíðindi, tá ambassadørar hjá øðrum tjóðum eru í Føroyum. Sum okkara journalistiska skylda er, spurdu vit hana um endamálið við vitjanini, og fingu har avsannað eina mytu um herstøð í Føroyum. Nakað vit nú hava sum sitat og kunnu vísa á, skuldi spurningurin komið upp at vent aftur – eisini yvirfyri amerikanarum.

Tað sum ger Birgir Kruse firtnan, kann helst kókast niður í hesa regluna: “Alt tað etableraða verður bypassað. Koyrt, siglt og flogið verður uttan um tað etableraða í høvuðsstaðnum.” Hvat vil Kruse her? Skuldi Norðlýsið sagt nei til eina samrøðu við Sands, tí KvF ella Sosialurin ikki eisini gjørdu nakra samrøðu við hana?

Hvørki Norðlýsið, Betesda ella Klaksvík kunnu álvaratos gera nakað við, at amerikanska sendikvinnan ikki hevur áhuga í at fara á formliga vitjan í Tórshavn. Og Havnin ella miðlarnir har hava heldur ikki krav uppá at fáa uppmerksemi, bara tí tey eru til.

Birgir Kruse skal hava loyvi til at vera nipin av, at amerikanska sendikvinnan leyp sítt kæra miðstaðarøki um. Men at skelda og konstruera eina konspiratiónsteori, sum bara manglar Illuminati fyri at vera fullfíggjað í øllum sínum absurditeti, er púra burturvið. Heldur átti Kruse at vent kanónunum ímóti sínum egna miðstaðarøki, ið er vorðið forvænt við, at alt og øll skulu koma av sær sjálvum til teirra.

 

Bloggurin hjá Birgir Kruse kann lesast her.

Lýsing
Seinastu tíðindini
Støkk inn kanningar á Klaksvíkar Sjúkrah…
Gadus fer nýggjan túr í kvøld
KÍ-Slovan Bratislava: Dysturin verður vi…
Maria og Rebekka settu báðar føroysk met…
Gott veður í næstu viku
KÍ fekk heimavøll og sterkt mótstøðulið
Smittubreiðslan minkað eitt vet seinastu…
Útvarpsguds­tænasta úr Christians­kirkjuni…
Hesum fýra liðunum kann KÍ møta
Hetta sigur KÍ-venjarin undan Champions…
Skjótari at fáa koyrikort til vinnuligan…
Borgarar í sóttarhaldi kunnu nú ringja t…
Mentan­arvikan í Runavíkar kommunu verður…
Eysturoy, - gráa leingjan - opið bræv ti…
Vøllurin við Djúpumýru góðkendur til evr…
Lands­stýrið letur 500.000 kr. til neyðhj…
KÍ hevur ongantíð skorað fleiri mál so t…
Hví reingir hann sannleikan?
Áheitan frá Fugloyar kommunu
Korona: Tímalønt mugu tryggjast