Føroyskur og danskur tónleikur burtur av Youtube
Á miðnátt í nátt, 31. juli, gongur avtalan millum Koda og Youtube út. Talan er um eina fyribils leinging av eini avtalu, ið gekk út í apríl, og Youtube vil ikki leingja hana longur. Krøvini frá Youtube til Koda eru strong, og umfata m.a., at gjaldið til tónleikararnar, hvørs tónleikur verður spældur, skal minka við umleið 70%. Hesum vil Koda ikki finna seg í, og tí verður ikki gjørligt at hoyra danskan og føroyskan tónleik á Youtube, áðrenn ein nýggj avtala er komin í lag.
Miðlastjórin hjá Koda, Kaare Struve, er sera misnøgdur við framferðarháttin hjá Youtube, og tað sama er forstjórin í Koda, Gorm Arildsen. Teir siga báðir við Ritzau, at Google, ið eigur Youtube, misnýta sítt vald sum “tech-gigantar” til at trýsta eina avtalu ígjøgnum, sum Koda ikki kann liva við. Teir siga, at gjaldið frammanundan var í lægra lagi í mun til hvat sangskrivarar og komponistar fáa frá øðrum stroymingartænastum.
Umframt føroyskan og danskan tónleik, so rakar hetta eisini finskan og norskan tónleik á Youtube. Ætlanin var at hesi londini skuldu gera eina felags avtalu við Youtube. Tað er ikki greitt, um Youtube steðgar tónleikinum beinanvegin, tá vit fara inn í august, men í øllum førum kann norskur, finskur, danskur og føroyskur tónleikur vera burtur av Youtube nær sum helst aftaná miðnátt.