Ikki kann sigast annað enn at kvinnurnar hjá KÍ eru í eini serstøðu í føroyskum kvinnufótbólti. Hóast spádómar um niðurgongd tá “tær gomlu fóru at leggja frá sær”, so síggja vit nú eitt nærum spildurnýtt kvinnulið fara til sigur aftaná sigur í landskappingini.

Aðrastaðni í landinum hava “bygdir og býir” roynt at lagt síni lið saman, fyri at manna seg upp ímóti KÍ kvinnunum, men hetta hevur í veruleikanum bara gjørt kvinnuliðið hjá KÍ sterkari.

Í dag var mótstøðuliði NSÍ, sum er á øðrum plássi í kappingini. Men eisini tær máttu av Klaksvík í dag við einum tapi upp á 2-0 til KÍ liðið.

KÍ kvinnurnar hava nú 33 stig fyri 11 dystir, altso fult stigatal, ímeðan tað liðið, ið er nr. 2 í dag er NSÍ, sum hevur 15 stig fyri 10 dystir.

Um kappingina hjá kvinnunum kann annars sigast, at munurin ímillum styrkina á teim ymsu liðunum er í dag nógv minni enn hann onkuntíð áður hevur verið. Dystirnir, sum spældir vera eru tí nógv tættari og tí eisini meira spennandi enn áður. Hetta vísir seg eisini í, at í dag eru fleiri áskoðarar til kvinnudystirnar enn vanligt hevur verið.

Myndir frá dystinum: