Sum sagt í áður, so var Norðlýsið við á tekniska royndartúrinum hjá Norðborg mikudagin. Umframt at hava Norðlýsið við sum ferðafólk, hevði skiparin eisini konuna við, eg haldi at tað vóru bara vit bæði, sum onki høvdu við umvælingarrbeiðið at gera.

Restin av fólkunum, sum vóru við á túrinum, høvdu úr at gera at kekka tey ymisku fákøkini, ið tey arbeiddu á. Nógv er at hyggja eftir. Eitt er høvuðsmaskinan, ið er einar 8.000 hk til støddar, men her er nógv onnur teknisk øki, ið treingja til eftirlit nú skipið hevur ligið stilt í góðar tríggjar mánaðir.

Vit vóru sum sagt tekniskan royndartúr, men vit fiskaðu ikki, so fabrikkin var ikki í gongd tann dagin.   Tað skal hon um eina løtu. Í skrivandi stundi eru vit á fiskimiðunum undir Íslandi, trolið er júst farið út og vit toga. Tá halað verður aftur skal fabrikkin í gongd og treyðugt so verður okkurt tá, ið eisini skal beinast á rættkjøl aftur. Annars gekk alt væl á túrinum, onkrar justeringar vóru, men høvuðsmaskinan spann so lystiliga allan dagin og tað gjørdi hon eisini nú á veg til Íslands.

Niðanfyri restin av myndunum frá tekniska royndartúrinum: