Peter Buhl Jensen er ein sera royndur yvirlækni við óvanliga stórari vitanartyngd. Hann hevur m.a. starvast sum leiðandi yvirlækni á onkologisku deild á Aalborg Hospital og sum yvirlækni á Ríkissjúkrahúsinum. Aftrat hesum hevur hann eisini drúgvar royndir í gransking og menning av krabbameinsheilivági og hevur fingið tvey sløg av heilivági góðkend av amerikanska heilivágsmynduleikanum (FDA) og europæiska heilivágsmynduleikanum (EMA).

Norðlýsið hevur fingið orð á Peter Buhl Jensen, og hann sigur við Norðlýsið, at hann er sera glaður fyri starvið á Klaksvíkar Sjúkrahús. Eitt, sum honum dámar serliga væl er, at hann sleppur at arbeiða breitt við almennum medisini, og harvið brúka nógv fleiri av sínum førleikum. Á størri sjúkrahúsum er alt meira spesialiserað, og læknarnir sleppa í minni mun at virka uttanfyri sína sergrein.

Petur Buhl Jensen heldur fram við at siga, at tað er ein fragd at arbeiða saman við royndu læknunum og fasta starvsfólkahópinum av sjúkrasystrum, ið sambært Peturi eru stak kompetentar.

At Klaksvíkar Sjúkrahús hevur ta stødd, sum tað hevur, gevur honum sum lækna møguleika fyri at fylgja væl við hvørjum einstøkum sjúklingi. Fakliga orðaskiftið millum ymisku fakbólkarnar og góði kunnleikin, ein fær til sjúklingarnar, geva tilsamans gott høvi til eina viðgerð á høgum stigi og ikki minst eina effektiva viðgerðartilgongd, har eisini tey avvarðandi verða drigin inn í tann mun, sjúklingurin ynskir tað.

Frá leiðsluni á sjúkrahúsinum hoyra vit, at tey eru serstakliga væl nøgd við læknan. Tey siga m.a. at tað at hava fingið ein fastan medisinskan yvirlækna, ger at kvaliteturin av viðgerðini hjá teimum medisinsku sjúklingunum hækkar. Leiðslan endar við at siga, at teirra dugnaligu forvaktslæknar bæði kunnu fáa sparring og blíva avlastaðir í ein ávísan mun.