Heimið við Vágna og sambýlið á Heygnum eru bygd til endamálið og fungera eisini gott.

Við einum ávísum kennskapi til røktarheimssektorin haldi eg, at vit kundu framt onkra rokering sum hevði givið nøkur pláss.

Her hugsi eg um Heimið við Vágna, sum uttan iva kundi húsa fleiri fastbúgvandi, um umlættingin var staðsett onkra aðrastaðnis.

Røktarheimsplássini sum eru samanbygd við sjúkrahúsið eru als ikki nøktandi karmar um fastbúgvandi óhjálpin, og eiga at vera avloyst av nýggjum røktarheimi, bygt eftir nútíðarkrøvum og til aktuella tørvin.

Verða Niðristova og Uppistova avloyst av nýggjum røktarheimi so gevur hetta ávísar møguleikar.

Til dømis kann onnur hæddin verið innrættað til eitt tíðarhósakandi hvíldarheim. Henda loysnin hevði komið bæði sjúkrahúsi og borgarum annars til góðar.

Hin hæddin kann so innrættast til tíðarhóskandi umlætting.

Hetta viðførir , at vit fáa nýggj røktarheimspláss í tíðarhóskandi kørmum.

Heimið við Vágna fær tá í minsta lagi pláss fyri 8 búfólkum aftrat.

Hetta er eitt dømi uppá møguligar broytingar sum kunnu geva fleiri tíðarhóskandi pláss til bæði røkt, umlætting og hvíld.

Vísa tit mær álit til kommunuvalið, so fari eg at arbeiða við praktiskum loysnum, har aktuella starvsfólkið verur tikið við uppá ráð.

SAMAN FRAMÁ