Atli: Eg tók av borgarstjórasessinum
Nógvur orðadráttur hevur staðist av, at Fólkaflokkurin sum suverenur toppskorari á býráðsvalinum í Klaksvíkar Kommunu endaði við 5 sessum, men telvaði soleiðis, at Sambandsflokkurin við bert einum sessi fekk borgarstjóran. Hetta varð eisini tikið upp í kjaki í Degi og viku mánakvøldið 16. november, tá John Johannesen, vertur, og Jóannes Hansen, valserfrøðingur, umrøddu nøkur úrvald val.
Norðlýsið hevur vent sær beinleiðis til tann, ið mest av øllum kann sigast vera høvuðspersónurin, nevniliga Atla S. Justinussen, ið fekk flestar atkvøður valkvøldið, og sum tí var tann mest upplagdi borgarstjórakandidaturin hjá Fólkaflokkinum. Atli Justinussen greiðir frá, at sjálvur var hann til reiðar at taka av borgarstjórasessinum, men eftir drúgva telving varð komið fram til, at besti møguleikin fyri at koma í meiriluta var at fáa sætta og avgerandi mandatið í hús.
Atli S. Justinussen vísir aftur, at talan nakrantíð var um innanhýsis stríð í Fólkaflokkinum um hvør skuldi gerast borgarstjóri, og um Fólkaflokkurin fekk borgarstjóran, so skuldi hesin verið Atli sjálvur. Sessurin stóð sostatt Atla Justinussen í boði, men tá avtornaði, var tað ein samdur Fólkaflokkur, har allir teir 5 innvaldu býráðslimirnir vóru á einum máli um at bjóða Karl Johansen úr Sambandsflokkinum borgarstjórasessin.
Á tann hátt gjørdust býráðssamgongan teir neyðugu 6 býráðslimirnir í tali, og styrkti seg eftirfylgjandi við Anniku S. Biskopstø úr Tjóðveldi, ið er sjeynda mandatið í býráðssamgonguni.