Hitafallið páskamorgun
Seinasta sunnumorgun fall hitin í Føroyum rættiliga nógv.
Vit høvdu havt eitt luftrák til Føroya av leiðini sunnan fyri Hvarvið, men páskamorgun fór luftpumpan - t.e. lágtrýstið í Norskahavi - eitt sindur frá okkum norðureftir, og tað fór at draga luft av Norðpólinum ímóti okkum ístaðin.
Sunnan fyri Hvarvið var hitin í luftini um 6-7 stig, meðan hitin í luftini í Norðurgrønlandi var -23 stig.
Her í Føroyum merktu vit ógvuliga væl til hetta luftskiftið, og allar veðurstøðir Landsverks máldu stóra mun í hitanum í luftini hesa løtuna.
Her verður hugt at tølunum við veðurstøðina við Dalavegin til Viðareiðis, sum er norðasta mátistøðin hjá Landsverki - sí myndina niðanfyri.
Klokkan 07.25 vóru máld 7,6 stig; klokkan 19.35 vóru máld -6,9 stig.
Hetta er eitt fall í hita à 14,5 stig í 12 tímar og 10 minuttir, ella 1,2 stig um tíman í miðal í eitt hálvt samdøgur.
Fallið í hitanum var tó ikki javnt. Tíðarskeiðið frá 07.25 til 08.55 fall hitin úr 7,6 stigum niður í 0,8 stig. Hetta eru 6,8 stig í 1½ tíma (4,5 stig/tíma).
