Sjálv koppsetingin er sjálvandi sjálvboðin, so landsstýrismaðurin hevur rætt til at takka nei. Trupulleikin liggur ikki har. Trupulleikin er, at landsstýrismaðurin meldar tað alment út nú, meðan støðan framvegis er kritisk, og koppsetingartilgongdin ikki er komin í helvt enn. Tað ger sjálvandi sera mong fólk ótrygg, bæði tey í Koppsetingartoyminum, men ikki minst tey, sum longu eru koppsett, umframt at tað kann fáa onnur fólk, ið ætlaðu at lata seg koppseta, um at halda seg aftur.

At koma við hesum beint nú, mitt undir koppsetingartilgongdini, ger, at tað ikki er løgið, at Kaj Leo Johannesen, Tummas í Garði, løgmaður og aðrir føla, at Jenis av Rana saboterar teirra arbeiði.

Andstøðan var kvik at seta løgmanni fyrispurning, har lagt varð upp til, at Jenis av Rana skuldi sigast úr starvi. Svarar løgmaður nei, so er tað ikki ósannlíkt, at næsta stigið hjá andstøðuni verður eitt misálitisuppskot. Og tá koma serliga sambandstingfólkini í eitt álvarsamt dilemma – skulu tey stuðla sínum egna landsstýrismanni, Kaj Leo Johannesen, í koppsetingartilgongdini? Ella skulu tey atkvøða ímóti fyri at bjarga samgonguni?

Koyrir løgmaður Jenis av Rana frá, ella um samgongan er við til at samtykkja eitt misálit á hann, so er neyvan nakað at ivast í, at samgongan er fokin. Og tað er sera ringt at síggja, hvussu løgmaður kann lappa eina nýggja samgongu saman. Hann kann bjóða Framsókn uppí eina borgarliga samgongu, men har hava vit sæð, at varalimurin hjá Framsókn hevur somu støðu sum Jenis av Rana, so har er líka vítt sum sítt. Tí kemur Framsókn í samgonguna, so krevja tey uttan iva ein landsstýrissess, og tá kemur varalimurin jú á ting. Ein møguleiki er tó at bjóða Sjálvstýri uppí eisini, so samgongan fær 18. Tá hevur hon ráð til, at ein einstakur tinglimur spælir fríspæl.

Men tað er sera ivasamt, um løgmaður letur tað koma vítt. Hann fer heilt víst fyrst at royna at tosa Jenis av Rana til rættis, og kanska biðja hann tillaga sína útsøgn, men spurningurin er, hvussu nógv tað hjálpir.

Ein annar møguleiki er at tinga seg fram til, at Miðflokkurin setir ein annan landsstýrismann fyri Jenis av Rana, í øllum førum fram til at magiska talið 70% ella 80% er rokkið. So fer Jenis av Rana í løgtingið í nakrar mánaðir, og tað kundi verið ein loysn, sum Miðflokkurin er sinnaður at liva við. Uppnáa vit so floksimmunitet, so er tað ikki longur tann stóri trupulleikin, at onkur ikki vil koppsetast. Tað er júst nú og teir komandi 2 mánaðirnar, at tað er kritiskt.

Tað er í øllum førum ringt at síggja, hvussu Landsstýrið kann halda fram óbroytt eftir hesa útmeldingina. Tað vil siga, at landsstýrismaðurin í heilsumálum (við løgmanni á síni síðu) og landsstýrismaðurin í uttanríkismálum draga hvør sína línu. Tað ber illa til at liva við. Men hetta eru Føroyar, og tað er langt frá altíð, at nakað fær avleiðingar her, sum hevði fingið tað aðrastaðni …