Bygningurin, har Nema hevur hildið til á Kósini, er nú seldur til Christian í Grótinum.

Vit hava enn ikki avgjørt, hvat bygningurin skal brúkast til í framtíðini, men hetta er ein íløga hjá okkum, tað er rætt, sigur Jan Petersen, stjóri hjá Christiani í Grótinum í stuttari viðmerking.

Vit hittu Gudny Langgaard, stjóra á Nema á deildini í Klaksvík. Gudny Langgaard sigur, at Nema leingið hevur havt ætlanir um at menna deildina í Klaksvík og at flyta longur heim í býin.

Tað hevur ikki verið lætt at funnið nakað hóskandi hjá okkum at flyta inn í, sum er meira ásýniligt í handilslívinum í Klaksvík, men nú hava vit funnið eina nøktandi loysn.

Tað, at vit nú hava selt hendan bygningin er ikki ein niðurlaging av deildini í Klaksvík á nakran hátt. Tvørturímóti hava vit ætlanir um at menna bæði tekniska partin og ikki minst handilin hjá Nema í Klaksvík. Vit síggja stórar møguleikar í at menna okkara virksemi her á staðnum, sigur Gudny Langgaard at enda.