Sjóhiti til Føroya Tele í Klaksvík
Fyrr í vár varð høvuðsteymur frá sjóhitaskipanini lagdur yvirum parkeringsøkið í miðbýnum. Úttøk vórðu gjørd til Mentanarhúsið, Angus og Føroya Tele.
Nú hevur so Føroya Tele grivið veit yvir til úttakið og lagt rør til íbindingina, so sjóhitarør nú eru løgd inn í telefonstøðina í Klaksvík.
Arbeiðið at skifta olju út við sjóhita er liður í grønari langtíðarorkuætlan, sum fevnir um allar bygningar og mastrar, øll tøknihús og tøkniskáp, sum Føroya Tele eigur.
Higartil hevur telefonstøðin í Klaksvík brúkt umleið 7.000 litrar av olju um árið, sum svarar til CO₂-útlát upp á 19.000 kg, greiðir Brian Rasmussen, deildarleiðari á NET frá.
Tað verður mett, at arbeiðið at skifta hitaskipanina kostar góðar kr. 330.000,- og at árliga sparingin verður umleið kr. 30.000,-. Tað tekur sostatt 11 ár at spara íløguna innaftur.
Føroya Tele hevur sum aðalmál at teirra orkunýtsla so vítt gjørligt verður umløgd til varandi orku, og at tey einki CO₂-útlát hava í 2030.
So enn eina ferð kemur sjóhitaskipanin hjá Klaksvíkar kommunu til sín rætt í miðbýnum – hesaferð hjá Føroya Tele.