Veðrið um vikuskiftið
Hann liggur av vestri í morgun. Vindferðin er, sambært veðurstøðunum hjá føroysku veðurstovuni, ímillum 5 og 10 m/s. okkurt ælið í støðum, men annars skýggjað og yvirhøvur turt kring alt landið. Hitin liggur um 2 til 4 stig.
Rákið av kaldari luft til Føroyar eru fyribils steðgað. Ístaðin er tað lýggjari luft av leiðunum vestan fyri Afrika, sum rekur hendavegin. Hon kølnar sjálvandi vegnum hertil.
Lýggj luft sunnaneftir inniheldur vanliga nógva vætu, og tí kunnu vit vænta skýggjað loft og avfall í vikuskiftinum.
Í dag fer ættin úr vestri niður í sunnan, og vindurin fer at minka niður í 2 til 7 m/s seint seinnapartin. Alla tíðina ælaveður við regni.
Í kvøld kemur eitt brúgvalag við regni sunnaneftir. Tað rakar Suðuroynna fyrst, og tað verður umleið klokkan 19 – 20. Tað rekur so norðureftir, og tað regnar kring alt landið til í morgin ári.
Hitin í dag fer at liggja um 3 til 6 stig.
Eftir midnátt, meðan tað enn regnar, fer vindurin at veksa upp í 10 til 15 m/s, og ættin fer í landsynning.
Um uppfaringartíð í morgin – t.e. klokkan 7-8 ella so – er brúgvalagið farið norðurum. Tað verður tó ikki heilt turt, tí ælingar við regni fara at allan morgindagin.
Ættin fer niður í sunnan, tá ið brúgvalagið hevur gjørt alt av sær, og vindurin fer at minka. Frá 7-8 tíðina í morgin til væl er liðið út á seinnapartin, eru 3 til 8 m/s av suðuri. Eftir tað fer hann at mala úr ymsum ættin eina løtu, men seint á kvøldið er ættin landnyrðingur, 13 til 18 m/s og aftur avfall. Í fyrstanini regn, men sum tímarnir ganga út á sunnunáttina er eisini kavi uppií.
Hitin í morgin fer at liggja um 5 til 7 stig.
Allan sunnudagin er ættin landnyrðingur. Vindurin minkar úr 13 til 18 m/s um náttina niður í 7 til 13 m/s um kvøldið. Skýggjað við sólglottum og kavaælingum, serliga fyrrapartin.
Hitin sunnudagin fer at minka úr 5 til 7 stigum niður í 2 stig.