Føroya Sjómannadagur mánadagin
Klokkan 19.00 nú mánadagin, skipar Føroya Sjómannadagur fyri fyrsta tiltakinum í ár. Tá fer Ann Sølvia Purkhús frá Tjóðsavninum at hava ein fyrilestur í Skúlanum á Skúlatrøð har fornar toftir í Klaksvík eru á skrá.
Sjálv lýsir Sølvia sín fyrilestur soleiðis:
Fornminni fram við sjóvarmálan.
Mánakvøldið tann 15. august kl. 19 í skúlanum á Skúlatrøð.
Framløgan fer at snúgva seg um fornminni, ið eru at síggja fram við sjóvarmálan í Borðoyavík í Klaksvík. Í hesum lendinum eru fleiri fornminni og júst her eru vit so heppin at fornfrøðiligur útgrevstur hevur verið í Borðoyavík, á einum staði, ið kallast niðri á Toft. Umframt at leggja fram um hendan spennandi fornfrøðiliga útgrevsturin niðri á Toft fer Ann Sølvia at tosa um aðrar toftir, ið eru at síggja í lendinum, til dømis forvitnisligu toftina úti í Grøv.
PS: Endaliga skráin fyri Sjómannadagsvikuna verður ikki kunngjørd fyrr enn mánadagin.