Tað var ikki tann stóra fótbóltsupplivingin í Kosovo í kvøld.

Kosovo var betra liðið, men fáir stórir málmøguleikar vóru. Kosovo kom á odda í seinna hálvleiki, men Føroyar svaraðu aftur, tá eitt langt spark eitt sindur tilvildarliga endaði hjá nýggja landsliðsleikaranum Stefan Radosavljevic, sum púra kaldur lyfti bóltin uppum málverjan og vísti enn einaferð, at hann hevur gott máltev í altjóða fótbólti.

1-1 gjørdist úrslitið í einum dysti, sum var merktur av nógvum broytingum hjá báðum liðum, keðiligum veðri og einum ivasomum vølli. Føroyingarnir stríddust og fingu eitt úrslit, hóast talan var um venjingardyst, sum sær gott út, í øllum førum á pappírinum.