Veðrið um vikuskiftið
Nú nakað er liðið út á seinnapartin, er lot av landnyrðingi norðanfjørðs, meðan tað kavar av møkum. Sunnanfjørðs er heilt annað veður, eitt lítið lot av suðuri ella landsynningi, gráskýggað og eitt sindur av regni.
Hitalagið norðanfjørðs er um frostmarkið; sunnanfjørðs um tey 4 stigini.
Í nátt fer veðrið, sum er norðanfjørðs, at troka tað lýggjara veðrið sunnanfjørðs burtur. Á middegi í morgin eru 10 til 15 m/s av landnyrðingi norði, skýggjað og kavaavfall. Hitin fer at liggja úr einum stigi undir frostmarkinum og upp í 3 stig.
Út á seinnapartin í morgin fer vindurin at minka niður í 5 til 10 m/s, og sum frálíður smáskýggjað. Men alla tíðina kavaavfall. Hitalagið sum nevnt omanfyri.
Sunnunátt og -morgun eru 3 til 8 m/s av norði ella landnyrðingi norði, klárari luft og yvirhøvur turt. Seinnapartin fer vindurin at veksa av landnyrðingi, og tað verður meira skýggjað. Um nátturðatíð eru 10 til 15 m/s, á midnátt 13 til 18 m/s. Allan seinnapartin og kvøldið kavaavfall.
Hitalagið sunnudagin úr minus 2 stigum upp í 3 stig.
Gott vikuskifti.