Løgmaður nevndi eftir vanligu innleiðandi flosklarnar tað at stytta arbeiðsvikuna við 3 tímum. Hóast samfelagið hevur tørv á meira arbeiðandi hondum, skulu føroyingar heim úr arbeiði fyrr uppá dagin. Tað kann einans merkja, at fleiri útlendingar skulu til Føroya at arbeiða, ella at minni skal arbeiðast yvirhøvur. Samstundis skulu túsundtals fólk – øll teirra í almenna arbeiðsmarknaðinum – hava eitt lønarlyft sambært Løgmansrøðuni. Og so varð eisini lovaður ein skattalætti. Tað stendur øllum greitt, ið duga at lesa, at hetta fer at kosta Føroyum kolossalar upphæddir.

Tá ið føroyska politiska leiðslan hevur brúkt ov nógvan pening, so hevur tað seinastu árini verið gott latín at velja nakrar vinnufyritøkur út, sum hava gjørt tað gott, og taka pengarnar haðani. Tí hava vit sæð nýggj hugtøk sum tilfeingisskatt og tøkugjøld. Men her eru vit longu komin at mørkum. Størsta alifyritøkan hevur longu flutt nógv virksemi til Skotlands. Skotska stjórnin hevur stýrt so væl, at har er ikki neyðugt við “tøkugjøldum”, og leggur nógv í at gerast eitt lokkandi íløguland. Stramma Føroyar skattaskrúvuna á alivinnuna stremri, er tað víst sum amen í kirkjuni, at meira virksemi flytur.

Síðani gjørdi løgmaður nakað burturúr at økja játtanina til at viðlíkahalda landsins bygningar, at seta fleiri samskiparar, at seta fleiri kommunulæknar, brekumboð skal setast, tvey sambýli skulu byggjast afturat. Og so skal eitt stórt og dýrt Tjóðleikhús byggjast í Havn. Tjóðleikhúsið kostar 185 milliónir, men einans um tey røttu fólkini verða sett til uppgávuna, og skil verður á. Verður onki fantilsi á, júst sum onki fantilsi var á stýringini av Glasi ella av H-bygninginum, kunnu vit helst brynja okkum til eitt skepilsi á Bursatanga, ið fer at tátta í hálva milliard.  

Tað nógva av útreiðslugildi løgmans (les: Landskassanum) skal hann onki gjalda fyri sjálvur. Tað verða kommunurnar, skulu gjalda bróðurpartin av lønarlyftinum og sín trivaliga part av stuttu arbeiðsvikuni, tí tað er har, flestu heilsurøktarar, námsfrøðingar v.m. í eru starvi. Og fyri at løgmaður ikki skal gjalda tað gildi, so stendur á s. 12 í røðu løgmans, at “Kommunurnar skulu eisini kunna […] krevja tænastugjald frá húsaeigarum, sum ikki búgva í kommununi”.

So fær samgongan makt, sum hon hevur akt, skulu tey, sum eiga summarhús ella hava arvað hús, aðrastaðni enn har tey búgva, rokna við eini klekkiligari eykarokning frá hesi samgonguni. Sambært Jógvani Kruse, borgarstjóra í Sunda Kommunu, er talan um einar 17.000 krónur um árið.

Aðalorðaskifti um Frágreiðing løgmans á ólavsøku 2023 verður í løgtinginum í morgin kl. 10.00