Veðrið um vikuskiftið
Ættin hevur ligið um eystan ella av landnyrðing í meiri enn eina viku. Tað fer hon hon eisini í vikuskiftinum. Luftin kemur av leiðunum í Mið- og Norðurnoregi. Har er hitalagið um tað sama, sum tað er hjá okkum.
Yvirhøvur er talan um óstøðuga og mettaða luft, so vit skulu ikki vænta at síggja nógv blátt loft.
Í dag kemur hann av landnyrðingi, vindferðin liggur um 5 til 10 m/s, loftið er samdrigið og okkurt ælið er í støðum. Seinnapartin fer vindurin at minka eitt sindur, niður í 3 til 8 m/s. Seint í kvøld veksur vindurin upp í 8 til 13 m/s, tað verður samdrigið og regn ella ælaveður. Hitin í dag um 4 til 8 stig.
Í morgin er aftur landnyrðingur, vindferðin 5 til 10 m/s, tað er skýggjað og regn. Út á dagin hálvskýggjað og ælaveður. Hitin í morgin 6 til 9 stig.
Sunnudagin fer hann at mala av ymsum ættum, skiftandi vindferð, fer í løtum upp í 10 m/s. Loftið verður skýggjað, og tað regnar. Seinnapartin fer hann í eystan, vindferðin fer at liggja um 5 til 10 m/s, loftið smáskýggjað og ælaveður. Um kvøldið og náttina minkandi niður í eitt frískt lot, minni enn 5 m/s. Hitin sunnudagin 6 til 10 stig.