Hóast tað bleiv til ein greiðan sigur til VÍF, tá kvinnurnar hjá Stjørnuni og VÍF í dag leiktu dyst í steypakappingini, so vóru tað avgjørt positiv ting, stjørnuleikarnari kunnu taka við til næsta dyst. Serliga var tað hugburðurin, sum var munandi betur, enn hann hevur verið seinastu dystirnar. Eitt, sum var sera óheppi fyri stjørnuliðið í dagsins dysti, var, at málverjin Nina Abramovic tíðliga í dystinum fekk eitt skot í anlitið, sum hevði við sær, at hon mátti av vøllinum, og spældi hon lítið og onki, tað sum eftir var av dystinum. Tað, sum helst ávirkaði Ninu nógv í støðuni, var, at til venjing seinasta týskvøld fekk hon eisini eitt hart skot í anlitið. Unga Borghild Sjúrðarberg kom so at standa tað mesta av dystinum í málinum, og tað kom hon, hóast alt, rímiliga væl frá.                                                                                                                  

Gongdin í dystinum var annars tann, at tað gekk rímiliga javnt á stóran part av fyrra hálvleiki. Tá farið varð til hálvleiks, var støðan 17-14 til VÍF.                                                                                                              

Dysturin bleiv avgjørdur fystu 15 minuttirnar av seinna hálvleiki, sum so ofta, so vóru tað serliga misnýttir upplagdir málmøguleika hjá Stjørnuni sum kostaðu dýrt, og blivu straffaðir við skjótum mótálopum. Dysturin endaði við einum greiðum 39-29 sigri til VÍF.                                                                                        

Eftir dystin hitti Norðlýsið nýggja venjaran hjá Stjørnuni Kára Horn. Hann segði, at nú hevur har akkurát tikið við sum venjari, og hevði undan dystinum í dag, bert havt eina venjing saman við liðnum. Hann heldur avgjørt, at liðið hevur fólk til betri plassering, enn hvat stigatalavan vísir. Hann kundi út frá dystinum í dag síggja, at her eru nógv ting at arbeiða við, og hevur hann góðar vónir um, at tað kann blíva munandi betur. Norðlýsið ynskir Kára góða eydnu við venjarastarvinum.