Rynkurnar farnar
Í sambandi við hesa serstøku fráferð, sum altíð byrjar úr Klaksvík, varð fyrrpartin í dag skipað fyri hátíðarhaldi fyri Team Rynkeby niðanfyri Sambýlið á Heygnum.
Borgarstjórin, Karl H. Johanesen, byrjaði løtuna við einari røðu og ynskti súkklarunum góðan túr. Eisini var tónleikur á skrá, har bólkurin Adrenalin spældi tvey løg.
Sigrun Niclasen helt eina rørandi røðu, umboðandi Team Rynkeby Føroyar og bað Jesus fylgja teimum á leiðini.
Við slík høvi verður eisini savnaður hópin av peningi til endamálið. Barnagarðar og næmingar á Skúlatrøð handaðu ikki so lítlar kekkar.
Tey hava skipað fyri ymiskum tiltøkum og á tann hátt savnað inn pening til Team Rynkeby. Peningurin fer óskerdur til børn við lívshættisligum sjúkum og familjur teirra.
Eftir røður og sang vóru øll bjóðað til kaku og kaffi í Smæruni. Síðan vóru súkklurnar sendar gott avstað við bestu ynskum.
Væl av fólki var komið saman at heilsa og biðja góða ferð. Tó at tað var nakað gráligt, so var av besta. Í nátt gongur leiðin við Norrønu til Danmarkar.