Formliga er tað arkitektavirkið Henning Larsen – North Atlantic, sum Norðurlandaráðið hevur tilnevnt, men tað er onki at taka feil av, at tað er kappróðrarneyst-bygningurin í Klaksvík, ið er verkið, arkitektavirkið er tilnevnt fyri.

Tilsamans eru 7 verkætlanir tilnevndar, og tað er ikki ein dómsnevnd, ið skjýtur upp, men almenningurin – í øllum førum í fyrstu atløgu –, og evnið er ymiskt ár um ár.

Úr grundgevingunum fyri tilnevningina stendur m.a. ” The building is a rethink of traditional Faroese boathouses, with wooden façades and big windows, where indoor and outdoor space merge. It is made of maintenance-free materials and has a grass roof for natural insulation. A work of art …”, á føroyskum:

“Neystið endurhugsar siðbundna føroyska neystið við træfasadum og stórum vindeygum, har innandura og uttandurapláss renna saman. Tilfarið er viðlíkahaldsfrítt og hevur flagtak at veita natúrliga bjálving. Eitt listarverk ...”

Víðari stendur, at neystið ríkar alt lokalumhvørvið.

Hini tilnevndu eru: Úr Íslandi: Arnhildur Pálmason, arkitektur. Úr Álandi: Löfbacka Traditionsbygg AB. Úr Svøríki: ETC Bygg. Úr Finnlandi: Liisa Akimof, ið hevur ment eitt øki kring tokstøðina Hoplax í Helsinki. Úr Danmark: Living Places Copenhagen. Úr Noregi: Gaia Arkitekter. Úr Grønlandi: Boligselskabet Iserit A/S.

Umhvørvisvirðislønin hjá Norðurlandaráðnum er 300.000 krónur og verður handað í Reykjavík til Norðurlandaráðharrafundin í vetur.