Eitt lágtrýst liggur beint vestan fyri Føroyar í dag og í nakrar dagar afturat, og tað ger hetta lýggja og slavna luftrákið ímóti Føroyum. Okkurt brúgvalag við regni er uppií, og eitt teirra hevur sett sín dám á veðrið gjárakvøldið og í dag eisini. Í støðum hevur tað regnað illa. Sunnukvøldið fer aftur eitt brúgvalag við regni at leska okkum.

Tað hevur verið eitt sindur av vindi av landsynningi í fyrrapartin , men út á seinnapartin fer vindurin at minka niður í eitt frískt lot til frískan vind, 5 til 10 m/s. Í kvøld gongur hann niður í sunnan og minkar niður í lot til frískt lot, 3 til 8 m/s, og sum frálíður fer at slíta í. Í nátt og morgin ári er lot til frískt lot av landsynningi, 3 til 8 m/s, klárt ella smáskýggjað og yvirhøvur turt. Hitin í dag fer upp í eini 15 ella 16 stig. 

Í morgin fer veðrið at vera gott – bert eitt lítið lot sunnan, minni enn 5 m/s, klárt loft ella tað er smáskýggjað við sólglottum, fyrrapartin kann tó okkurt ælið vera í støðum. Hitin í morgin fer at vera sum í dag, 10 til 15 stig.

Sunnumorgunin er framvegis eitt lot til frískt lot av landsynningi, 3 til 8 m/s, smáskýggjað og sólglottar, men eisini okkurt ælið í støðum. Seinnapartin fer vindurin at veksa upp í eitt lot til frískt lot, 5 til 10 m/s, tað fer at draga á luftina, og okkurt ælið verður. Um kvøldið frískur vind upp í hvassan vind, 10 til 15 m/s, samdrigið og regn. Hitin sunnudagin 10 til 15 stig.

Gott vikuskifti.