Seinasta hóskvøld spældu teir samanlagt 130 minuttir í nógva hitanum í Bosnia Herzegovina, og kortini megnaðu teir at halda leiðsluni í heilar 82 minuttir, áðrenn Banja Luca megnaði at fáa tað útjavnandi málið, sum førdi til eykatíð, har bosniska liðið fekk eitt mál afturat og harvið fór við samlaða sigrinum.

Hetta eru okkara dreingir, sum hava lyft okkum upp á hægri hæddir og loyvt okkum at droyma stórar dreymar við flottum sigrum á stórum mótstøðuliðum.

Hóskvøldið restaðu bara 8 minuttir av vanligu leiktíðini, tá ið teir fingu útjavnandi málið ímóti sær, men kortini hildu teir høvdið høgt og kempaðu fyri sigrinum í samanlagt 130 minuttir í strævna hitanum.

Soleiðis eru okkara dreingir. Teir geva alt í síni umboðan fyri Klaksvík og fyri Føroyar, og teir hava eisini gjørt lítla bý og land okkara kend kring knøttin. Teir hava sett okkum á heimskortið.

Slík avrik koma ikki av ongum. Tey krevja sera nógv av okkara monnum, og tí hava teir tørv á okkara stuðli – nú meir enn nakrantíð fyrr, tí nú hóskvøldið skal seinasta altjóða skotið í byrsuni hjá KÍ fyri í ár latast av, tí tá verður fyrri dysturin ímóti finsku meistarunum úr HJK Helsinki.

Nú eru teir móðir, onkrir eru skaddir, men tíbetur eru teir flestu tøkir til hetta seinasta ódnartakið á heimavølli, sum hóskvøldið verður á Tórsvølli kl. 19:45.

Enn einaferð er møguligt at uppliva eitt søguligt kvøld við KÍ á Tórsvølli, og tað kennist á leikarunum, at teir trúgva upp á ein sigur hóskvøldið – so nú er spurningurin til okkum fjepparar, um vit vilja geva teimum enn størri grund til at trúgva og fara eftir enn einum hetjuavriki.

Tað ber til! Teir hava gjørt tað fyrr!

Kom á Tórsvøll hóskvøldið kl. 19:45 !!

KOYR Á KÍ !!!