Tað verður ongin upptøka til Grøna Háskúlan nú í heyst, og sambært Dimmalætting dettur skúlin av tí sama niðurfyri. Orsøkin er, at háskúlalógin setur sum fortreyt, at fyri at fáa játtan skal skúlin í minsta lagi hava 12 næmingar við 9. floksprógvi. Víðari stendur í tíðindaskrivi frá Grøna Háskúlanum, at umframt tað kravið skulu 12 næmingar vera millum 17 og 25 ár.

Hetta merkir, at hóast áhugin skuldi verið stórur millum fólk uttanfyri hendan smala málbólkin, so verður kortini onki skeið upprættað, um ikki minst 12 næmingar eru í smala málbólkinum. Eisini skulu næmingarnir læra um føroyskt mál og føroyska mentan í minst 16 vikur.

Hesi krøv megnar Grøni Háskúlin ikki at liva upp til, og tískil ber ikki til at fara undir háskúlaskeið nú í heyst.

Tað stóð annars á s. 11 í samgonguskjalinum, at háskúlalógin skuldi broytast (uttan at tað tó stendur til hvat), men nú knapt tvey ár seinni kann bara staðfestast, at onki er hent. Seinasta broytingin í lógini varð gjørd í undanfarna valskeiði.