Tað hevur verið gott veður í morgun við bláum himni og sól næstan allastaðni í landinum. Lotið er sunnaneftir, upp í 7 m/s. Í nøkrum fáum støðum eitt sindur skýggjað, tó ikki nógv meir enn smáskýggjað.

Seinnapartin fer at vera smá- ella hálvskýggjað, og tað okkurt ælið verður í støðum, ella bara sirm. Í kvøld skýggjað og í støðum mjørki, ístøðum sirm ella mjørkatám. Hitin í dag upp í 18 stig, har sum ættin er góð, men í flestu støðum upp í 14-15 stig. Í kvøld kølnar helst nokkso fitt, tí tað er so klárt – kanska niður í 6-7 stig.

Í morgin er eitt lítið lot av ymsum ættum, minni enn 5 m/s. Sum líður á dagin 3 til 8 m/s av útsynningi. Skýloftið eitt sindur skiftandi, men helst turt allan dagin. Hitalagið neyvan so høgt sum í dag, men upp í eini 14-15 stig í støðum, har tað lívir fyri ættini. Um náttina niður í 5 stig.   

Sunnudagin 3 til 10 m/s av útsynningi og yvirhøvur turt allan dagin. Fyrra partin av degnum samdrigið og kanska stundum regn ella sirm. Út á dagin skiftandi skýloft. Hitin 7 til 13 stig.

Gott vikuskifti.