Virðilig og innihaldsrík ellisár í Norðoyggjum
Eldrasamstarvið ímillum kommunurnar í Norðoyggjum hevur stórar og krevjandi avbjóðingar fyri framman. Ein eldradepil við fjølbroyttum tænastum kann vera ein týðandi partur av loysnini.
Vit kenna øll støðuna á eldraøkinum í dag, og vit vita, at talið á eldri borgarum fer at økjast í framtíðini. Hetta setur okkum øll undir trýst at finna loysnir, sum tryggja best møguligu umstøður fyri eldru borgarar okkara.
Vit eru á rættari leið, nú Klaksvíkar kommuna hevur tikið fyrsta stigið og er í ferð við at ogna sær eitt lendi við Gravarbø. Ætlanin er at byggja ein eldradepil, har vit vónandi fáa bæði atkomuligar eldraíbúðir við vakrari náttúru og eitt røktarheim til tey óhjálpnu. Røktarheimið skal samstundis veita tænastur til tey eldru, sum búgva í íbúðunum, soleiðis at gerandisdagurin verður innihaldsríkur, og trivnaðurin verður á hægsta stigi.
Tað er alneyðugt, at allar kommunurnar í Norðoyggjum standa saman um hetta felags málið. Samstarv millum kommunur og borgarar er lykilin til at skapa eina haldgóða og varandi loysn, sum bæði tænir teimum eldru og gevur yngra ættarliðnum møguleika at tryggja sær eitt heim og eina framtíð í økinum.
Ein eldradepil er ein íløga í bæði eldru og komandi ættarlið okkara, sum vit øll hava ábyrgd av. Tað er ein íløga, sum loysir fleiri avbjóðingar samstundis. Og ein íløga, sum heilt víst fer at løna seg.
Signhild V. Johannesen