Tað lágtrýstið, sum hevur sent ta køldu luftina ímóti okkum, er um leiðina við Jan Mayen. So leingi tað er har, og einki annað trokar seg nærri Føroyum, er veðrið sum tað er í dag.

Leygarkvøldið og sunnunáttina fer ein hátrýstryggur at leggja seg yvir Føroyar við góður veðri – t.e. lítil vindur og yvirhøvur turt, tó kanska okkurt ælið í støðum. Tá ið hann er farin eysturum mánanáttina, fara lágtrýst at nærkast okkum vestaneftir, og vit fara at fáa nakað væl lýggjari veður alla næstu viku.

Men nokk um tað hesaferð – niðanfyri er veðrið um vikiskiftið:

Restina av degnum í dag 5 til 10 m/s av útnyrðingi, smáskýggjað og kavaæl. Sum líður á seinnapartin og í kvøld minkar vindurin niður í 3 til 8 m/s. Í kvøld fer hann upp í norðan og veksur vindin upp í 5 til 10 m/s. Hitin í dag millum frostmarkið og 5 stig.

Í morgin er ættin norðan og útnyrðingur, 5 til 10 m/s, hálvskýggjað og kavaæl. Um kvøldið og náttina gongur hann niður í vestan og minkar vindin eitt sindur. Hitin fer at liggja millum frostmarkið og 5 stig.  

Sunnudagin útsynningur, 3 til 8 m/s, skýggjað og okkurt ælið. Sum frálíður lækkar hann í sunnan og veksur vindin, 8 til 13 m/s, í støðum upp í 15 m/s. Tað verður samdrigið og regn. Hitin fer at liggja millum 4 og 9 stig.

Gott vikuskifti.