Vanliga hava noturnar í ársfrágreiðingum ikki so stóran áhuga. Men í hesum døgum við politiskum rumbli um almenna bústaðarfelagið Bústaðir má serligur áhugi vera fyri notunum í ársroknskapinum hjá Bústaðir fyri 2023. Serliga er tað notan um innroknan og ásetan av virðinum á materiellu støðisognum felagsins, sum hava áhuga.

Í 2022 ársroknskapinum brúkti Bústaðir 30 ár í brúkstíð at avskriva íbúðarognirnar við einum restvirði á íbúðararognunum ásett til 30% av upprunaliga keypsvirðinum eftir 30 ár. Í ársroknspapinum fyri 2023 er brúkstíðin broytt til 50 ár, meðan restvirðið eftir 50 ár nú er ásett til 50% av keypsvirðinum.

Í ársfrágreiðingini fyri 2023 eru roknskapartølini fyri 2022 eisini broytt samsvarandi nýggja roknskaparháttinum. Úrslitið fyri 2022 er broytt frá at vera eitt hall á 2,1 milliónir krónur til eitt avlop á 1,5 milliónir krónur. Eginognin við ársenda 2022 er uppskrúva við 15 milliónum krónum av broytta roknskaparháttinum. 

Roknskapurin fyri 2023 vísir tó framvegis eitt stórt hall á 2,3 milliónir krónur, sjálvt um roknskaparhátturin er broyttur. Undirskotið hevði tó verið enn størri, um man ikki broytti roknskaparhátt, tá avskrivingarnar høvdu verið væl størri í so fall. Hallið hevði tá verið áleið 6 milliónir krónur. 

Við ársenda 2023 hevði Bústaðir einans 8,5 milliónir krónur í tøkum peningi. Tað framgongur eisini av roknskapinum, at Bústaðir við ársenda 2023 hevði verkætlanir í gerð fyri 261 milliónir krónur. Ei undur í, at tað skuldi ganga skjótt fyri seg við at fáa nýggju lániheimildina samtykta í Løgtinginum í vár. 

Her tykist soleiðis at vera enn ein greið ábending um, at Bústaðir hevur trupulleikar við fíggjarliga haldførinum.