Hvat sigur fiskifrøðin nú? og hava tit verið á støð og hugt, hvussu toskurin sær út?
Fyri einum ári síðani á Torradøgum í Klaksvík var temaið á fundi: Toskastovnurin er komin á gravarbakkan, Fiskifrøðin væl mannað, saman við alvitandi Fiskimálaráðharranum tilmælti, at nakað alvorligt mátti gerast nú beinavegin: Meira friðingar, TAC niður, fiskidagarnir fækkast, ja, toskur mátti helst ikki fiskast komandi árini.
Var sjálvur boðin við á hendan fundin. Royndi sum frægast at greiða frá, at toskastovnurin var als ikki so illa fyri, sum sagt varð frá, og at væntast kundi, at longu komandi vár fór at blíva góður fiskiskapur aftur. Hetta metti eg út frá eygleiðingum av veðurfyribrigdum og havstreymum, sum eg hevði kannað ígjøgnum mong ár, saman við tí vitan, eg sjálvur havi frá egnum royndum.
Og rætt var spátt: Tað hevur ikki verið so nógvur toskur á landgrunninum seinastu 20-30 árini sum júst nú, og er hetta 4-12 ára gamal toskur, sum av fiskifrøðini varð sagdur ikki at vera til.
Ein má stórliga undrandi spyrja: Hvat sigur fiskifrøðin nú? og hava tit verið á støð og hugt, hvussu toskurin sær út?
Tórshavn, 17.mars 2025
Osmund Justinussen
