Ikki færri enn tríggjar ferðir síðstu tvey árini hevur KÍ avgjørt dystirnar móti EB/Streymi í 95. minutti ella seinni. Í dag møtast liðini fyri fyrstu ferð í ár, og so fáa vit at síggja, um dramatikkurin fer at halda fram í ár, tá hesi møtast.

Hjá KÍ eru skaðar farnir at raka hópin umframt, at Jákup B. Andreasen hevur leikbann. René S. Joensen fekk skaða í lærkrikanum við landsliðnum, og hann verður ikki við í dag. Hallur Hansson spældi ikki seinna landsdystin, men vit hava nú fingið upplýst, at tað var ikki tí, at hann ikki var tøkur. Hann væntast at spæla í dag. Tað sama væntast vinstri bakkurin, Robert Williams, sum kann fáa sínar fyrstu skrásettu minuttir fyri KÍ. Mads Boe Mikkelsen og Filip Brattbakk hava verið darvaðir av skaðum og eru ivasamir. Enn hevur eingin av argentisku leikarunum hjá KÍ spælt nakran minutt, men tað verður helst broytt í dag, har vit kunnu vænta, at onkur av teimum fær sínar fyrstu minuttir.

Hjá EB/Streymi verður møguleiki at síggja upp til fýra klaksvíkingar. Óli Ey. Poulsen, Símun Kalsø, Kristian S. Eliasen og Niels Pauli Danielsen eru allir partur av hópinum.

Dysturin í Klaksvík byrjar kl. 15.00. Dómari verður Rúni Gaardo.