
Samgongan revsar reiðarí í Klaksvík
Broytingin í lógini um sjófeingi tykist verða snikkað til soleiðis, at JFK er valt út til at revsa – uttan at JFK hevur gjørt nakað ólógligt – og nú skulu smáir aktørar enntá eisini revsast afturfyri at samstarva við JFK. Aðrastaðni spyr borgarstjórin í Klaksvíkar Kommunu, um tað yvirhøvur er legalt at gera so.
Landsstýrismaðurin, sum sjálvur býr í Eysturkommunu, sigur í skrivi, at um samtøk hava skipað seg við einum móðurfelagi, sum øll loyvi verða kanaliserað ígjøgnum, so merkja tey ikki lógarbroytingina negativt nú. Varðin, sum eisini hevur heimstað í Eysturkommunu, verður ikki raktur. Orðarætt sigur landsstýrismaðurin, at ”Tað eina samtakið hevur ikki skipað seg soleiðis, og er tað tískil helst eisini tað einasta, sum veruliga følir hesa broytingina her og nú.”
Hetta eina ”samtakið” er JFK í Klaksvík.
Men sum tað eisini er nevnt fleiri ferðir, so verða nú onnur reiðarí í Klaksvík eisini rakt, tí tey verða roknað sum ”nærstandandi feløg” hjá JFK.
Andstøðan royndi at fáa broytingina útsetta, og tað hevði givið reiðaríunum í Klaksvík eitt skotbrá til at umrátt seg í, um tey vildu skipa seg í eitt samtak við móðurfelagi eins og t.d. Varðin, og um ja, so fingið stundir til at gjørt neyðugu bygnaðarbroytingarnar. Hevði tað verið gjørt, so vóru øll feløg skipað á tann hátt, sum landsstýrismaðurin sigur seg vilja hava tey skipað.
Men tað skotbráið vildi samgongan ikki geva teimum. So kann man spyrja, um orsøkin til tað var, at so fekk man ikki revsað JFK og hini reiðaríini í Klaksvík.