Undir 1. viðgerð av lógaruppskotinum um pensjónsaldur, vístu fleiri fleiri á, at vit eiga at gera broytingar soleiðis, at tey sum altíð hava arbeitt kunnu fara á pensjón fyrr.

Landsstýrismaðurin var ein av teimum sum gjørdi hetta greitt, og hevur nú orðað eitt lógaruppskot í samráð við samgonguumboðini í Trivnaðarnevndini og leiðslunum í samgonguflokkunum.
Uppskotið tekur við hesum hædd fyri teimum sum hava verið á arbeiðsmarknaðinum síðani tey vóru 16-19 ára gomul.

Uppskotið tryggjar teimum pensjón, ið hava havt í minsta lagi eitt hálvtíðarstarv í 50 ár. Tey sum áhaldandi hava arbeitt síðani tey vóru 16 ára gomul kunnu fara á pensjón sum 66 ára gomul, 68 ára gomul, um tey hava arbeitt síðani tey vóru 18 ár osfr.

Hædd verður tikin fyri, at kvinnur hava verið í barnsburðarfarloyvi. Hóast barnsburðarfarloyvistíðin var væl styttri enn hon er í dag, verður fyri hvørt barni roknað við at kvinnan hevur verið av arbeiðsmarknaðinum í eitt heilt ár. Hædd verður somuleiðis tikin fyri skjalfestum barnsburðarfarloyvi annars, arbeiðsloysi, sjúkrafráveru og líknandi.

Hetta lógaruppskotið kemur í gildi tá pensjónsaldurin í 2035 er 70 ár.
Tá kunnu tey sum hava arbeitt síðani tey vóru 16 ár ella eldri fara á pensjón aftaná 50 ár á arbeiðsmarknaðinum.

Í 2018 samtykti Løgtingið at pensjónsaldurin tann 1 juli 2024 skuldi hækka við hálvum ári og aftur við hálvum ári 1 juli í 2030. Tað vil siga, at í 2030 er pensjónsaldurin 68 ár. Eisini varð samtykt, at Løgtingið bert kann hækka pensjónsaldurin við hálvum ári fyri hvørt fimta ár.

Í uppskotinum, ið Sirið Stenberg, fyrrvernandi landsstýriskvinna í Almannamálum bar í Tingið fyri jól, hækkar pensjónsaldurin við einum ársfjórðingi um árið. Fyrstu ferð í 2035, tá pensjónsaldurin hækkar til 68 ár og 3 mánaðir, og seinastuferð í 2042, tá pensjónsaldurin hækkar til 70 ár

Avgerðin   um,   at   pensjónsaldurin   skal   hækka,   er   tikin   við   støði   í framrokningum av væntaða livialdrinum hjá 67 ára gomlum føroyingum.

Nú fær Løgtingið møguleikan at viðgera uppskotið um Tíðartreytaða pensjón.