Skráin til Summarfestivalin minnir um tær flestu undanfarnu: Góð og vælkend føroysk nøvn saman við áhugaverdum og ungum potentiellum stjørnuskotum. Og so eitt stórt útlendskt høvuðsnavn, sum í ár er UB40. Mestur fer ”Red Red Wine” at ekkóa millum Kjøl og Halgafelli náttina til leygardag.

Longu mánadagin byrjaðu campingvognarnir at seta sín dám á býin, og miðbýurin hevur havt umlagda ferðslu at kalla líka leingi, eins og bussarnir ikki koyra sum vant. Hetta krevur sjálvandi vælvild frá Klaksvíkar býarbørnum, og tann vælvildin verður vanliga veitt við gleði. Tað er hon eisini í ár, og tí kunnu øll kenna seg væl og vælkomin at vera.

Karmarnir kring um festivalin spíla seg eisini út. Í Varpinum verður forkunnug café, og við Djúpumýrar tekur flaggskipið í føroyskum fótbólti ein steðg frá europeiska ævintýrinum og fer at undirhalda fjøldina á heimavølli. Í samanløgdu hallunum verður Silvaland sum vant til børnini, ið eisini hava eitt Disney-show á sjálvum festivalinum at gleða seg til í ár.

Tiltikið er, at um nakar gongur við gron á Summarfestivalinum, so hevur hann sjálvur skyldina. Hetta eru tríggir dagar, har allur býurin heldur veitslu, og har fólkatalið veksur til tað dupulta av íbúgvaratalinum í Klaksvík. Hesar dagarnar finst hvørki høgur ella lágur, og møguligar ósemjur lata vit liggja við hús hendan summarsliga tónleikafagnaðin.

Við hesum reglum vil Norðlýsið ynskja øllum festivalgestum eins og fyriskiparum ein framúr góðan Summarfestival.