Undir 1. viðgerð av fíggjarlógini fyri 2026 fekk fyrst landsstýrismaðurin í fiskivinnumálum av grovfílini frá Jacob Vestergaard, løgtingsmanni og fyrrverandi fiskimálaráðharra, fyri at hava afturhildið upplýsingar av týdningi fyri viðgerðina frá Løgtinginum, nevniliga ICES-tilmælið, ið varð almannakunngjørt sama dag sum fíggjarlógin, 30. september, ið mælir til álvarsaman niðurskurð av fiskiskapinum og harvið av inntøkugrundarlagnum hjá Landskassanum.

Síðani hartaðu tingfólk hjá samgonguni Jacob Vestergaard álvarsliga fyri sínar ákærur. Serliga Høgni Hoydal og Karlot Hergeirsson tóku rívan til og vardu fiskimálaráðharra sín.

Umboð fyri Fiskimálaráðið og Havstovuna søgdu tað sama sum landsstýrismaðurin – ICES hevði ikki vent sær til Føroya Landsstýri fyrrenn 30. september, aftaná at Ruth Vang hevði lagt fíggjarlógaruppskotið fram. Tí var ógjørligt at taka hædd fyri skerjingum í uppskotinum til løgtingsfíggjarlóg, sum jú longu var framlagt, áðrenn nakar kendi til evt. skerjingar.

Nú er so komið undan kavi, at so var ikki.

Jacob Vestergaard, løgtingsmaður, hevur sjálvur verið fiskimálaráðharri í fleiri umførum, og hansara royndir søgdu nakað heilt annað. Hann segði av Løgtingsins røðarapalli, at Landsstýrið í sínari tíð kendi til tilmælini, áðrenn tey vórðu almenn, og hann helt tað ikki passa, at tann mannagongdin nú var broytt til, at øll í Føroyum verða kunnað samstundis. Hann setti tí fyrispurning fram, og í svarinum vísti tað at vera so, sum Jacob Vestergaard segði – ICES hevði longu vent sær til Fiskimálaráðið 19. september. Tí hevði verið gjørligt at tikið tað við í fíggjarlógaruppskotið.

Men av onkrari løgnari orsøk var tað strandað onkustaðni í Fiskimálaráðnum, og kunningin kom tí hvørki fram vertikalt til topparnar í Fiskimálaráðnum og tíansheldur horisontalt út til Fíggjarmálaráðið ella longur upp til løgmann.

Eina stutta løtu varð roynt at verja borg við at siga, at trúnaður og tagnarskylda skuldu verið viðvirkandi. Men tað manaði landsstýrismaðurin effektivt niður aftur í jørðina beinanvegin í Degi og viku – hann hevði als ikki fingið kunningina, t.v.s. heldur ikki í trúnaði. Fiskimálaráðið hevði heilt einfalt latið vera við at kunnað seg. Tað setir sjálvandi Jóhan Christiansen í eina penibla støðu sum ein landsstýrismann, ið verður forbígingin av sínum undirorðnaðu og tí ikki hevur stýr á sínum málsøki. Og tað frítekur hann ikki fyri ábyrgd, og tí er tað hann, ið fekk eitt nefs.

Ein fjølmiðil rør framundir, at misálitisuppskot kann verða reist týsdagin, og at tað, um tað verður lagt fram, ikki óhugsandi verður samtykt, um ikki landsstýrismaðurin fer frá áðrenn. Tað er mikið møguligt. Tí eisini Karlot Hergeirsson og Høgni Hoydal, sum vardu fiskimálaráðharran, munnu í dag sita við reyðum oyrum, nú Jacob Vestergaard vísti seg at hava sannleikan á síni síðu. Um tað so strekkir til, at teir fara at fella landsstýrismannin, má tíðin bara vísa.

Jacob Vestergaard hevur sagt seg umhugsa støðuna, og tað kann merkja, at misálitisuppskot verður reist, møguliga longu á fyrstkomandi tingfundi týsdagin 21. oktober kl. 11.