Sum nakað nýtt hevur Kvøldskúlin í heyst bjóðað sjónleikaskeið fyri børn, í samstarvi við Klaksvíkar Sjónleikarafelag.  21 børn úr 3., 4. og 5. flokki høvdu teknað seg til skeiðini, sum endaði við familjuframførslu í Spinnarínum hóskvøldið 27. nov.

Yngri bólkurin, sum hevði arbeitt við smáum leikmyndum og “sketchum”, høvdu samansett eina lítla sýning, sum tey kallaðu “Norðoyastevnuteitið Junior”, meðan eldri bólkurin framførdi eina modernaða útgávu av Reyðhettu, við hiphop, hettutroyggjum og rappsangi. Ein sera hugnalig løtu á loftinum í Spinnarínum, og kunnu vit gleðast um at eiga so nógvar dugnaligar sjónleikaspírar her norðuri.

Undirvísari er Birita Adela Davidsen, sum fæst við sjónleik og opera, og m.a. hevur skrivað og leikstjórnað barnaleikirnar “Papageno og Gandadrykkurin”, “Hevur tú sæð Carmen?” og pixi-útgávuna av kendi operuni “Gandafloytan” eftir Mozart.