Kappingarráðið hevur góðkent, at Wenzel yvirtekur ognirnar hjá Komfortbilum. Treytin er, at Wenzel frásigur sær Volvo-virksemið.
Wenzel hevði fingið eina ov ráðandi støðu á marknaðinum fyri premium-bilar, um felagið yvirtók ognirnar hjá Komfortbilum. Tað vísa greiningarnar hjá Kappingareftirlitinum.
Fyri at ganga hesum ivamálum á møti hevur Wenzel givið tilsøgn um at frásiga sær Volvo-virksemið. Við hesi treyt góðkendi Kappingarráðið yvirtøkuna 16. oktober.
Volvo-eigarar í Føroyum skulu tó framhaldandi hava atgongd til garantiservice og umvælingar, inntil ein onnur fyritøka hevur fingið góðkenning sum Volvo-verkstaður.
Kappingarráðið metir, at tilsøgnin hjá Wenzel er nøktandi og gongur kappingarligu ivamálunum í sambandi við yvirtøkuna á møti.
