Reiðarafelagið hevur fleiri ferðir áður víst á, at ávísar ásetingar í lóg um serstakar treytir fyri fiskiskap eftir ávísum fiskasløgum í 2016 og 2017 vóru brot á frælsa samráðingarrættin, og felagið hevur eisini talað at hesum. Stevnt verður ikki eftir eini peningaligari upphædd, men rætturin skal taka støðu til, um talan var um brot á tann frælsa samráðingarrættin.

Talan er ítøkiliga um tær ásetingar, sum staðfesta, at gjald fyri kvotur, keyptar á uppboðssølu, ikki kann dragast frá søluvirðinum, tá ið hýrur verða gjørdar upp og goldnar manningini. Hetta varð eftir felagsins tykki gjørt í grein 7, stk. 2 í lóg um serstakar treytir fyri fiskiskap eftir ávísum fiskasløgum í 2016 og 2017. Talan er í hesum føri um ávísar ásetingar í einum ávísum sáttmála, sum vórðu settar úr gildi við lóg.

Reiðarafelagið ynskir sum arbeiðsgevari at verja tann frælsa samráðingarrættin, sum er staðfestur í Europeiska Mannarættindasáttmálanum. Hetta fyri at tryggja, at felagið kann samráðast og gera sáttmálar við manningarfeløgini uttan ítøkilig inntriv frá landinum.

Reiðarafelagið hevur áður boðað landsins hægstu myndugleikum frá, at málið fór at vera latið Føroya Rætti til støðutakan, og tað er nú gjørt vegna alt felagið.