Hetta er tíðin, tá størru útróðrarbátarnir við fiskiloyvi undir Íslandi plaga at fara vestur um hav. Í ár hevur verið eitt sindur ivasamt hjá hesum bátunum, kanska mest orsakað av at fiskiskapurin av upsa undir Íslandi ikki hevur verið so góður hesi seinastu árini og kanska eisini tí at prísurin heldur ikki hevur verið í topp. Tað sum eisini spælir inn er, at línufiskiskapurin undir Føroyum enn er sera góður, bátarnir fáa nógva hýsu. 

Norðsøki hevur so avgjørt at fara avstað ímeðan Líðhamar hevur avgjørt at halda áfram við útróðrinum undir Føroyum. Orsøkin er kanska hon, at Norðsøki hevur betri toskakvotu undir Íslandi enn Líðhamar hevur, tí hevur Norðsøki møguleika at liggja meira á toskinum har yviri.