Hesum fara fólk at taka væl ímóti
Soleiðis sigur Sakaris Frederiksen, stjóri á Fonn Flog, tá Norðlýsið hitti hann í París seinnapartin týsdagin. Stjórin fegnaðist um, at Atlantic Airways nú er byrja at flúgva beinleiðis til franska høvuðsstaðin.
Umboð frá Fonn Flog eru farin til París at hyggja nærri at býnum og teimum møguleikunum ið býurin hevur at bjóða. Eitt nú hava tey vitja í Disneyland, hugt at hotellum, og annars uppliva býin við gongutúrum og siglt eftir Seinen ánni.
París gevur nógvar møguleikar
Stjórin greiðir frá, at nýggja flogleiðin gevur teimum á Fonn Flog nógvar møguleikar í framtíðini.
- Vit merkja ein stóran áhugað millum fólk eftir at prøva hesa leiðina. Mong ynskja at fara ein familjutúr, og brúka mesta partin av tíðini í Disneylandi, meðan onnur leita sær meira inn til býin, og vilja uppliva serstøku mentanina.
Víðari sigur Sakaris, at ein annar týðandi møguleiki við nýggju flogleiðini er at fólk kunnu nýta París sum eitt fet á vegnum, tá tey fara víðari út í heim.