Tosaðu við Brand fyri løtu síðani. Janus Sørensen segði, at teir høvdu um 10.000 pund í dag, eini 4.000 pund av toski, restin hýsa, metti hann. Hann segði annars, at tað hevði ikki verið serliga slætt norðanfyri í morgun. Vit tosaðu eisini við Gundur Sørensen við Anru, hann segði at teir settu bara 23 stampar í morgun, men Kunoyarnes fekk trupulleikar og mátti rýma frá línuni, so Anru hevur eisini drigið 13 stampar hjá Kunoyarnesi. Gundur Sørensen, skipari á Anru segði, at teir fóru at seta 23 stampar afturat nú seinnapartin millum grynnurnar, hann metti at teir høvdu eini 8000 til 8.500 pund higartil av kruvdum fiski.

Á Fiskamarknaðinum hevur Líðhamar uppgivið 11.200 pund í dag, ímeðan Stakkavík hevur uppgivið 6.300 pund. So útróðrarbátarnir fiska væl.