Tað hevur í eina tíð verið greitt, at Per Klarup, sum hevur verið høvuðsvenjari hjá Stjørnuni seinnu árini, ikki heldur fram eftir lokið kappingarár.

Á fundi í KÍ-høllini í gjárkvøldi bleiv kunngjørt, at avloysarin fyri Per er funnin. Nýggjur høvuðsvenjari hjá Stjørnuni komandi kappingarár verður 28 ára gamli havnamaðurin Christoffur Gert Nielsen. Hóast sín unga aldur, so hevur Christoffur drúgvar royndir sum venjari, serliga sum ungdómsvenjari, bæði í Danmark og hjá  Kyndil. Kappingarárið 2017-2018 vandi Christoffur saman við Flemming Raben besta kvinnuliðið hjá Kyndil. Hetta seinasta árið hevur Cristoffur verið hjálparvenjari hjá 2. div. kvinnur  hjá danska felagnum Ajax.  Eisini hevur Cristoffur seinastu tvey árini verið hjálparvenjari hjá Per Klarup, sum hevur verið landsliðvenjari hjá gentum 1998-1999 og 2000-2001.

Christoffur hevur síðani 2010 tikið ymiskar hondbóltsvenjaraútbúgvingar, og er hann nú innstillaður til Diplomvenjaraútbúgving í 2021, sum er hægsta nationala venjaraútbúgvingin í Danmark.

Á fundinum í gjárkvøldi segði Christoffur m.a., at hann sera spentur uppá uppgávuna sum høvðusvenjari Stjørnuni, og fyri at verða so tætt knýttur at felagnum sum gjørligt, hevur hann gjørt av at flyta til Klaksvíkar at búgva.

Á fundinum skrivaðu Súsanna Lydersen forkvinna í Stjørnuni og Christoffur undir sáttmála, sum í fyrsta umfari er galdandi fyri kappingarárið 2020-2021.