Frískt lot í dag
Í dag fer at kølna eitt sindur. Luftrákið hevur verið av vestri í nátt, men er nú við at flyta seg upp ímóti útnyrðingi seinnapartin, og upp í norðan í kvøld.
Luftin kemur av innlandsísinum í Eysturgrønlandi.
Hitamátarar Vørns siga frá 4 – 6 stigum, men tað fer at kølna 1 – 2 stig í dag.
Vindferðin er um 10 til 15 m/s, og soleiðis fer at vera allan dag. Hetta er miðalvindur fyri alt landið. Mesti vindur norðanfyri; minsti vindur eystanfyri og sunnanfyri.
Í dag kunnu væntast æl við regni ella kava.
Veðrið næstu dagarnar fer at vera nokkso støðugt.
Eitt hátrýst er við at plaserað seg sunnan fyri Ísland. Tað fer at forða lágtrýstum við vindi og regni at nærkast Føroyum 4 – 5 teir næstu dagarnar.
Ættin hetta til týsdagin fer at vera ímillum vestan og norðan, og vindferðin, eftir at hon er minkað í kvøld, fer at vera undir 10 m/s. Tað fer at vera løtur við avfalli næstu 4 – 5 dagarnar. Ælaveður í dag við regni og/ella kava – eisini í morgin, leygardagin. Sunnudagin fyri tað mesta turt; mánadagin og týsdagin aftur ælaveður við regni.