Frægari upsafiskiskapur enn árini frammanundan
Tað sigur Andor Isaksen, skipari á partrolaranum Baki. Bakur partrolar við Stelki. Vit fingu fatur á Andor Isaksen fyri løtu síðani. Hann er umborð á Baki, sum í løtuni roynir eystanfyri eins og flestu upsabátarnir.
Vit fóru út fríggjadagin í síðastu viku og rokna við at landa veiðuna týsdagin í komandi viku. Fiskiskapurin hevur verið hampuligur, vit hava í løtuni um 300 kør, (um 280 kg. eru í karinum).
Tað sum fari er av árinum, hevur hildnast hampuliga væl. Vit hava fingið meira higartil í ár enn vit hava fingið í fleiri ár frammanundan, sigur Andor Isaksen, og leggur afturat: Vit hava fyri tað mesta roynt eystanfyri, á Fugloyarbankanum, Nólsoyarbankanum og Sandoyarbankanum. Í januar gjørdu vit tó onkran túrin vestur úr Mykinesi. Eg haldi at tað sær eisini betur út við upsafiskiskapinum frameftir, tí upsin vit hava fingið í ár hevur verið góður stórur gýtingarupsi, hetta er upsi, ið vit í veruleikanum ikki hava sæð í fleiri ár.
Annars er eitt sindur trupult hjá okkum at royna, tí so nógvar friðingar verða gjørdar. Júst í morgun hava teir stongt á Munkagrunninum, tað sýnist sum um at stongt verður hvørja ferð vit fáa eitt sindur av fiski, sigur Andor Isaksen, skipari á Baki.