Eftir stutta túrin undir Føroyum, fór Klakkur av Klaksvík í gjár, mikudagin 8. apríl. Málið er Eysturgrønland, har teir fara at royna eftir toski.

Klakkur er mest framkomna línuskipið í føroyska línuflotanum og hevur møguleikar at skera til flak og frysta, ella eisini at rundfrysta toskin.

Bethuel Johannesen, ið er heima hendan túrin sigur, at orsakað av óvissuni um marknaðin, blívur ikki skorið til flak hendan túrin. Haraftur í móti, verður toskurin frystur rundur H/G, sum tað eitur á fákmálinum, toskurin verður frystur avhøvdaður. Framleiðslan verður seld til víðari framleiðslu á landi.

Um líkindini fyri fiskiskapi nú, sigur Bethuel, at ein norskur og ein grønlendskur línubátur eru har á Heimlandsrygginum, teir hava havt hampuligan fiskiskap. Hetta er sunnari enn vit plaga at royna. Longur norðuri verður ikki latið upp fyrr enn 1. juni. Línubátarnir á Heimlandsrygginum hava møtt nakað av ísi har nú.

Hvussu langur túrurin hjá Klakki verður, er ilt at spáa um nú, tí tað veldst um hvussu fer at gangast við fiskiskapinum, sigur Bethuel Johannesen at enda.

16 mans eru við Klakki.