Í morgun var spenningur í Íverksetarahúsinum í Klaksvík, tá Trekk úr valskúlanum á Skúlatrøð luttók í danmarksmeistarakapping í íverksetan í fólkaskúlanum.

24 bólkar úr Danmark, 1 úr Føroyum og 1 úr Grønlandi kappaðust í Next Level kappingini, ið fonden for Entreprenørskab skipar fyri. Eftir ætlan skuldi stórsligin finala verða í Kolding, men so rakti koronasmittan, og tiltakið varð broytt, so at bólkarnir innritaðu seg á tiltakið í hvør sínum lagi, og stroymdu sínar framløgur fyri dómsnevndini.

Trekk er sum sagt mannað av næmingum í valskúlanum, tey eru Kristina Hansen, Karl Andreasen, Emilia Rasmussen, Rói Sørensen, Tórálvur Brestisson, og teirra verkætlan er ein kryddrøð við tara í. Ein taradressing, eitt tararasp, ein tarakryddlaki og eitt tarasalt.

Trekk vóru væl fyrireikaði, sóu snøgg út ílatin blusir við búmerki á, og vøruúrvalið stóð til framsýning í krukkum og fløskum. Framløgan gekk væl, og tey greiddu frá verkætlanini, um vøruna, samstarv við lokalar veitarar og sølustøð, fíggjarætlan, marknaðarføring og hvussu taravøran passar við heimsmálini hjá ST, tá tað kemur til burðardygd.

Dómararnir settu spurningar um vøruna, um marknaðin, heimasíðu, fígging og annað, og skoðsmálið tey fingu var at framløgan var góð og fevndi breitt, somuleiðis vóru dómararnir á einum máli um, at tey áttu at farið í holt við fyritøkuna, tí hon hevur so gott potentiale og var so væl fyrireikað.

Tá avtornaði var tað ein bólkur frá Vesterdal Efterskole ið vann kappingina, við einari verkætlan um eina leiku til smábørn, ið skuldi leggja upp til betri umhvørvisvanar longu frá ungum aldri.

Trekk vóru væl nøgd við at sleppa í donsku finaluna, og siga seg hava lært ótrúliga nógv um at byrja egna fyritøku í hesari tilgongdini.