Sands: Vónandi fæst Donald Trump til Føroya
Um Donald Trump vinnur forsetavalið, vónar amerikanska sendikvinnan í Keypmannahavn, Carla Sands, at tað fer at eydnast at fáa hann at vitja bæði Danmark og Føroyar. Hon kundi sjálvsagt ikki lova nakað, men tað hevði verið nakað, hon gleðiliga vildi sæð ført út í lívið.
Í samrøðuni, sum Norðlýsið hevði við amerikonsku sendikvinnuna, varð sjálvsagt komið inn á tilboðið frá amerikanska forsetanum um at keypa Grønland frá Danmark. Hetta var púra óhoyrt í Grønlandi og Føroyum, men søguliga er tað ikki óhoyrt í hvørki USA ella Danmark. Fyri bert 103 árum síðani seldi Danmark vestindisku oyggjarnar til júst USA, og USA hevur eisini keypt fleiri risastór landaøki, til dømis Louisiana og Alaska. Men tað er greitt, at føroyingar og grønlendingar ikki tosa sama mál sum amerikanarar tí viðvíkjandi.
Carla Sands greiddi frá, at Donald Trump er vanur við at selja fastogn frá sínum privata lívi. “He’s a real estate mogul”, segði hon orðarætt, og helt at Trump helt seg hava fingið eyga á ein góðan handil. Hon legði upp til, at tað var meira natúrligt, at Grønland hoyrdi til Norðuramerika enn Europa, tí landafrøðiliga liggur Grønland á amerikanska kontinentinum, hóast tað politiskt er í ríkisfelagsskapi við Danmark.
USA vil fegið hjálpa til í okkara øki, og ítøkiliga nevndi Carla Sands respiratorarnir, sum forsetin hevði álagt bilafyritøkum at gera eina rúgvu av, og sum USA hevði sent til lond, ið vantaðu respiratorar. At USA til tíðir virkar protektionistiskt og nationalistiskt metti sendikvinnan vera neyðugt, og hetta undirbygdi hon við ítøkiligum dømum, so sum at múrurin móti Mexico skuldi halda fólki úti, sum vórðu landsforvíst vegna kriminalitet
Sí samrøðuna niðanfyri