Norðborg: Stýrimansvaktin skal eisini hava ís
Sum eg segði fyrr í dag, so hava vit ikki koyrt trolið út aftur. Tangarnir, har vit koyra sildina í áðrenn hon fer í maskinuna til flakaskeringar, eru fullir. Skiparin hevur avgjørt, at vit trola aftur í morgin. Orsøkin er, at frystilastin helst verður full av flaki tá alt er skorið, sum í tangunum er. Fyri at hava okkurt at seta ígongd við tá Norðborg fer avstað aftur kanska týskvøldið, fara vit at tova uppí tangarnar áðrenn vit fara inn.
Tá vit góvust at fiska vóru vit einar 90 fjórðingar norðureystur úr Fugloynni. Seinnapartin hava vit siglt spakuliga og leita vestureftir, men vit hava enn ikki sæð tað stóra.
Men ís skal sum nevnt eisini stýrimansvaktin hava og tað eru teir eg havi avmyndað her. Eisini haldi eg at súlurnar eru so ótrúliga vakrar, at eg koyri nakrar nýggjar myndir av teimum við. Eisini fingu vit vitjan av einum smáfuli í dag: